Gjilberta Lucaj vijon karrierën e saj si violonçelsite në SHBA. U largua nga Shkodra me një bursë studimi dhe tashmë jeta e saj është e zhvendosur në New York. Në një intervistë për “Diaspora Shqiptare” Gjilberta Lucaj tregon se ka dhënë mbi 100 koncerte për shqiptarët në mbarë Amerikën, si dhe është gjithmonë e angazhuar në eventet e Diasporës.
Gjilberta si ka qenë historia jote e emigrimit në SHBA?
Jam lindur dhe rritur në Shkodër dhe kam ardhur në SHBA me bursë shkollore të plot (full scholarship) për të studiuar muzikë. Kam studiuar këtu me disa nga profesorët më të mirë që kanë marrë “Grammy Awards” (çmimi më i madh në muzikë).
Kur nisi pasioni juaj për muzikën?
Kam filluar të studioi violonçel në shkollën “Prenk Jakova” në moshën 4.5 vjeçare. Kisha shumë dëshirë të mësoja piano, por atëherë askush nuk kishte piano në shtëpi për arsye ekonomike dhe mami im më tha të studioja violonçel, sepse ishte një instrument me zë shumë të bukur.
Çfarë do të thotë të jesh një muzikante shqiptare në New York?
Unë kam studiuar me shumë se asnjë njeri që kisha moshatarë. Dhe konkurrenca në New York është më e fortë në gjithë botën, sepse është këtu që bëhen karrierat me famë botërore. Por kam pasur fat dhe vullnet të madh për t’ja arritur pikësynimit tim të karrieres. Kur isha akoma në shkollë këtu, fitova një konkurs të madh për muzikantët e tij dhe performova në “Carnegie Hall” në vitin 2001, vend që është një ëndërr për gjithë muzikantët. Gjëja më e bukur ishte se nëna ime ishte në rradhën e parë të audiencës duke me filmuar.
Aktivizoheni me projektet e Diasporës në vendin ku jetoni?
Po jam angazhuar shumë gjatë gjithë këto viteve që jetoj në Neë York dhe kam dhënë mbi 100 koncerte për shqiptarët gjithkund në Amerikë.
Pandemia ka penalizuar artin, si edhe shumë fusha tëtjera. Keni ndonjë projekt momentalisht?
Në fakt unë jam angazhuar Pothuajse aq shumë sa gjithmonë me projekte inçizimi e shfaqje këtë vit pandemie, por veçse në komputer dhe jo live.
Po ashtu tani jam duke marrë pjesë në një kuartet që quhet: “Oda Quartet” dhe kemi inçizuar një album që del në të gjitha platformat muzikore: iTunes, Spotify, Iheartradio etj., më 5 Prill në orën 2:00 pm.
Po ashtu sapo kam firmosur një kontrakte me “Monterey Symphony” ku ato kanë financuar një kompozitor me famë botërore, John Wineglass të kompozoi një koncert për violonçel dhe orkestër nën temat muzikore shqiptare.
Mendoni se Amerika është vërtetë vendi i mundësive, për të gjithë ata që duan të arrijnë ëndrrat e tyre?
Patjetër! Këtu mundesh të arrish gjithçka në botë, por shumë njerëz nuk e kuptojnë sa shumë duhet të punosh dhe sakrificat që duhen bërë.
A janë trojet shqiptare tashmë më të njohura për shtetasit e huaj me të cilët ju keni kontakte?
Absolutisht! Që në koncertin tim të parë, në biografinë time, fjalia e parë është: e lindur dhe rritur në Shqipëri. Dhe shumë njerëz nëpër koncertet e mia në gjithë botën më pyesnin, ku është Shqipëria. Unë jam dhe do jem një avokate e madhe për vendlindjen time.
Për çfarë ju merr malli më shumë nga vendelindjajuaj?
Për gjithçka. Njerëzit e afër të familjes që akoma janë atje, për shtëpinë ku jam rritur, për rruget, për ushqimet e përsosura, për miqësinë dhe bujarinë e shqiptarëve.
Me “Oda kuartet” do të bëjmë disa koncerte në Shqipëri nga viti tjetër dhe po ashtu do bëj disa koncerte solo. Mezi po pres!
