Të flesh falas, në një fshat në Molise. Kjo është e mundur: mjafton të dhurosh një libër. Roman, libër me ese, libër për fëmijë, libër me poezi – pak rëndësi ka. Mjafton që të jetë një libër. Nisma vjen nga Macchiagodena, një fshat malor në provincën e Isernia-s, që në kështjellën e tij Longobardo ka selinë kombëtare të rrjetit: “Fshatrat leximit”. Gjatë kësaj vere, kur shpresohet që vendi të rimëkëmbet nga pandemia, Macchiagodena ka vënë një bast: synon turizmin e lexuesve, kureshtarë që të zbulojnë jetën e një qyteti në zemër të Apenineve.
Projekti quhet “Genius Loci” dhe do të nisë brenda qershorit. Slogani është: “Më sill një libër dhe do të dhuroj shpirtin”. Me vetëm një kusht. “Një libër për t’ia dhuruar Vendit” – shpjegon Luciana Ruscitto, këshilltare për kulturën dhe turizmin në Macchiagodena.
Falë një marrëveshje mes Komunës dhe operatorëve, muajt e ardhshëm do të jenë në dispozicion dhoma “bed and breakfast” dhe bujtina në agroturizme – mjafton të kontaktoni administratën dhe të kërkoni datat dhe vendet e lira, edhe për më shumë net, nëse do të jetë e mundur. “Njerëzit do të mund të flenë falas” – saktësojnë nga komuna, edhe më shumë net, të vetëdijshëm se kjo ftesë mund të tingëllojë e çuditshme.
Kështjella në Macchiagodena
Synimi nuk është t’u japim një dorë vetëm restauruesve, bareve dhe prodhuesve (të mishit, reçelit, konservave) – por t’ua bëjmë të njohur një pjesë të Molises, pak të njohur, që ka ende shumë për të ofruar – shtigjet natyrore të Lipu-s, rrugëtime për mountain bike, sitin romak arkeologjik të Saepinun, vendpushimin për ski në Campitello Matese, Muzeun Ndërkombëtar në Agnone.
Deti Adriatik, në një distancë prej 80 kilometrash, mund të shihet në horizont kur ngjiteni në kodrën Gonfalone, prapa Macchiagodena, e cila nga ana tjetër ndihet si një fshat malor, duke pasur parasysh se ngrihet 850 metra mbi nivelin e detit, ku në dimër bie borë dhe Polenta është pjata tradicionale.
“Dhe është kjo jetë e thjeshtë që duam të tregojmë – thotë nënkryetarja e Bashkisë Donatella Midea – Në verë kemi mbledhjen e tartufit të bardhë; në fund të tetorit mbledhjen e rrushit Montepulciano dhe Tintilia; në nëntor mbledhjen e ullirit; në dhjetor, therjen e derrit ”. Dhe kjo nuk është e gjitha, sepse në korrik dhe gusht fshati ripopullohet nga shumë banorë të cilët janë larguar në dekadat e fundit për të kërkuar punë në Amerikë, Australi dhe Gjermani. Ngjarja më e shumëpritur është Sagra della Polenta, të shtunën e parë pas 15 gushtit (Shën Marisë).
Tarraca e leximit në Macchiagodena
“Në librin që do të dhurojnë, turistët duhet të shkruajnë dedikime, të cilat do të përmblidhen në një album” – shpjegon shpjegojnë nënkryetarja Midea dhe këshilltarja për kulturë Ruscitto. “Kur ata të mbërrijnë duhet të thonë se pse kanë zgjedhur këtë vend dhe komunitetin tonë. Para largimit duhet të na rrëfejnë përshtypjet dhe përvojën e tyre. Projekti ‘Genius Loci ‘nuk lidhet vetëm me turizmin. Është një shkëmbim kulturor mes vendit tonë dhe njerëzit që do të mirëpresim”.
