Ndërsa Gianluigi Donnarumma ende nuk ka rënë dakord për një kontratë të re me Milanin, raportohet se Juventusi ka bërë gati gjithçka nevojitet për të bindur gardianin t’i bashkohet bardhezinjve.

Më datë 30 qershor portieri i Milanit del i lirë dhe kuqezinjtë mund të humbasin lojtarin më të vlefshëm të skuadrës, falas. Corriere dello Sport raporton se Juventusi është gati t’i ofrojë një kontratë me 10 milionë euro pagë neto në sezon gardianit të Italisë.

Ky kusht është gjithë ajo që Donnarumma po kërkon nga Milani, që e ka dërguar ofertën e tij deri në 6 milionë euro. Juventusi ka nisur bisedimet me agjentin e portierit, Mino Raiola. Jo vetëm kaq sepse drejtuesit e “Zonjës” e dinë mirë se kjo lëvizje është në dorë edhe të dikujt tjetër.

Il Giornale bën me dije se Juventusi është gati t’i japë një bonus prej 20 milionë eurosh Mino Raiolas dhe 3 milionë të tjerë do të shkojnë në llogari të babait të Gigios. Ndërkohë, Milani flitet se ka arritur marrëveshje me Mike Maignan, portierin e Lille.