Presidenti Joe Biden pritet të bëjë një turne në Evropë gjatë këtij muaji, në atë që do të jetë udhëtimi i tij i parë jashtë vendit që nga marrja e detyrës.
Në një njoftim të enjten Shtëpia e Bardhë bëri të ditur se zoti Biden, do të takohet me udhëheqës botërorë në Britani, Belgjikë dhe Zvicër gjatë turneut të tij evropian nga data 10 deri në 16 qershor.
“Ky udhëtim do të nxjerrë në pah angazhimin e SHBA-së për të rivendosur aleancat tona, për të ringjallur marrëdhëniet transatlantike dhe për të ndërtuar një bashkëpunim të ngushtë me aleatët tanë dhe partnerët e shumëanshëm për të zgjidhur sfidat globale dhe për të garantuar më mirë interesat e Amerikës“, tha në një deklaratë zëdhënësja e Shtëpisë së Bardhë Jen Psaki.
Më 10 qershor Presidenti Biden pritet të takohet me Kryeministrin Britanik Boris Johnson si dhe do të marrë pjesë në samitin e G-7-s që mbahet në datat 11 deri 13 qershor në qarkun Cornwall në Anglinë jugperëndimore.
Zoti Biden do të takohet me Mbretëreshën Elizabeth më 13 qershor përpara se të niset drejt Brukselit në Belgjikë, për samitin e NATO-s që mbahet më 14 qershor. Gjatë samitit ai do të “konfirmojë angazhimin e Shteteve të Bashkuara ndaj NATO-s, sigurisë transatlantike dhe mbrojtjes kolektive”, tha zonja Psaki.
Gjatë qëndrimit në Bruksel zoti Biden pritet të takohet gjithashtu me Presidentin turk Rexhep Tajip Erdogan “për të diskutuar rreth një game çështjesh bilaterale dhe rajonale” si dhe për të marrë pjesë në Samitin SHBA-BE më 15 qershor. Gjatë këtij samiti pritet të diskutohen ndër të tjera çështje të sigurisë shëndetësore, rimëkëmbjes ekonomike globale si dhe ato të ndryshimeve klimatike.
Presidenti Biden do të takohet gjithashtu me Mbretin e Belgjikës Philippe dhe Kryeministrin Alexander De Croo.
Gjatë udhëtimit të tij evropian Presidenti amerikan Biden do të ndalet edhe në Gjenevë te Zvicrës “ku pritet të zhvillojë një takim me Presidentin rus Vladimir Putin më 16 qershor”, tha zonja Psaki.
Gjithashtu zoti Biden do të takohet me Presidentin zviceran Guy Parmelin dhe ministrin e Jashtëm të këtij vendi Ignazio Cassis.
