Ndërsa gjysma e vitit ka kaluar, është koha për t’u ulur një moment dhe për të vlerësuar. Këtë vit kemi dëgjuar nga shumë drejtues që ata dhe ekipet e tyre po përballen me rraskapitjen.
Ata kërkojnë ide dhe teknika lehtësisht të zbatueshme për t’i ardhur në ndihmë. Unë i këshilloj drejtuesit dhe ekipet e tyre të bëjnë këtë pyetje të thjeshtë: “Në gjashtë muajt e fundit, për çfarë jeni krenar?”
Kjo bie ndesh me praktikën e zakonshme të vlerësimit të përqendrimit vetëm në atë që ju dhe ekipet tuaja dëshironi të përmirësoni. Këtu janë disa ide se si të evidentoni ato pika që ju bëjnë të ndiheni krenarë dhe të ngrini sa më shumë moralin e ekipit.
Hapi 1: Pikënisja
Përqendrohuni së pari në krijimin e mundësisë për të gjetur kohën për të menduar për gjashtë muajt e fundit. Mos u nxitoni. Jepni vetes pak kohë për të menduar kur jeni vetëm ose shkëmbeni ide me grupin tuaj. Një grup që unë trajnova, patën një diskutim të ndezur për momentet e tyre të krenarisë për një orë të tërë; kjo u bë e mundur sepse drejtuesi kishte caktuar kohë të mjaftueshme në dispozicion.
Unë rekomandoj mbajtjen e shënimeve për të gjithë, për të shkruar për atë me të cilën krenohen për veten e tyre dhe anëtarët e ekipit. Mos harroni se jo të gjithë do të dëshirojnë t’i ndajnë mendimet e tyre më të tjerët; krijojini mundësitë ekipit tuaj në mënyrë të tillë që të reflektojnë edhe privatisht. Një ide tjetër është që ekipet t’i shkruajnë letra vetes për gjërat me të cilat krenohen; ose, ti shkruajnë një letër një anëtari të ekipit. Merrni parasysh kulturën dhe dinamikën e grupit për të përcaktuar hapin e parë më të mirë për ekipin tuaj.
Hapi 2: Plani i komunikimit
Ky nuk ka pse të jetë një proces i gjatë; për shembull, mund të krijoni një tabelë me shënimet e gjithsecilit, ku ata kanë shkruar se për çfarë janë krenarë. Po aq e rëndësishme është të bëni një plan se si do të festoni sukseset e ekipit tuaj.
Kam vënë re që në bisedat me drejtuesit këtë vit, ata nuk kanë ndarë një pjesë të mirë të arritjeve të tyre. Për të krijuar një ambient pune sa më pozitiv dhe për t’i ngritur moralin ekipit tuaj, duhet të gjeni kohë për të festuar për arritjet tuaja. Në vend që të kërkoni vazhdimisht se çfarë duhet të përmirësohet, ndani sukseset dhe çastet që i bëjnë ata të ndihen më krenarë.
Hapi 3: Përcaktimi i objektivave
Çfarë lloj pune mund t’ju bënte krenarë në të ardhmen? Pyetja të tilla si kjo dhe të pasurit e një plani me objektiva do t’ju ndihmojë të ndërtoni bazat për sukseset tuaja të ardhshme.
Këtu janë disa pyetje që mund të përdorni për të vlerësuar përpjekjet tuaja dhe ekipeve tuaja:
A na çon kjo drejt përmbushjes së një objektivi më të madh?
Si do të ishte i suksesshëm ky projekt?
Si mund të krijoni bazat për sukses?
Çfarë mund të shtoni më shumë për të arritur këto objektiva, etj?
Pyesni: Për çfarë do të ishit krenar?
“Për çfarë do të ishit krenarë?” Kjo është pyetja e përsosur për t’ua bërë ekipeve tuaja ose kolegëve ndërsa shkëmbeni ide së bashku. Krijoni një vizion të atyre objektivave të cilat shpresoni t’i realizoni.
Të mendosh për atë që ju bën të ndiheni më shumë krenarë është pika ideale fillestare për të parë atë që dëshironi të arrini në të ardhmen. Bëni një përmbledhje të asaj që po shkon mirë, në mënyrë që ju dhe ekipet tuaja të frymëzoheni për të ecur përpara.
