Maqedonia dhe Shqipëria nënshkruan marrëveshje me të cilën obligohen së bashku të punojnë në zgjidhjen e sfidave të trashëguara dhe aktuale në ekologji rreth liqenit të Ohrit. Sipas ministres së Kulturës, Irena Stefoska, faji për situatën në të cilën është i tërë rajoni duhet të kërkohet te institucionet qendrore dhe lokale.

Nevojitet një koordinim më i madh dhe nevojiten shumë resurse, veçanërisht në aspektin financiar – tha Irena Stefoska-Ministre e Kulturës.

Marrëveshja me Shqipërinë përfshin përpunim të planit strategjik me qëllime qartë të definuara, nisma dhe projekte të mbrojtjes, si dhe masa konkrete me kornizë të caktuar kohore.

Për të ruajtur pasuritë e rajonit dhe vendit, ne duhet të jemi shumë të angazhuar, dhe unë me kënaqësi të madhe e nënshkrova marrëveshjen e sotme – deklaroi Elva Margariti – Ministre e Kulturës në Shqipëri.

Një nga rekomandimet e UNESKO-s ishte mbyllja e deponive jolegale në Ohër dhe Strugë. Ministri i Ekologjisë, Naser Nuredini ka komentuar deklaratën e kryetarit të Strugës Merko, të dhënë disa ditë më parë, se në deponinë jolegale në Strugë mund të bëhet piknik, sepse është mirëmbajtur mirë.

Jemi në kontakt të vazhdueshëm me autoritetet lokale. Unë nuk kam qenë në piknik në deponi. Është pyetje për kryetarin e Strugës e jo për mua – u shpreh Naser Nuredini- ministër i mjedisit.

Lidhur me largimin e objekteve të ndërtuara në mënyrë të paligjshme në Ohër dhe Strugë, ministrja Stefoska thotë se nuk ka standarde të dyfishta ndaj askujt.