Mbi 1 mijë e 500 persona u paraqitën në qendrën shëndetësore të Deçanit në Kosovë pas shfaqjes së shenjave tv helmimit të cilat fillimisht mendohej se vinin nga uji i pijshëm.
Nga të dhënat e publikuara nga Institutit Kombëtar i Shëndetit Publik u konstatua se në ujë janë gjetur disa baktere, por që këto analiza nuk u pranuan nga Kompania Rajonale e Ujësjellësit “Hidrodrini”, të cilët edhe kërkuan përsëritjen e analizave të ujit.
Për të folur rreth kësaj situate dhe dyshimeve se pse ka ardhur deri te helmimi ka folur koordinatorja në Qendrën e Monitorimit të Ujit në Institutin e Shëndetit Publik të Kosovës, Burbuqe Nushi-Latifi.
Ajo në një intervistë në emisionin “Përballje” me kryeredaktorin Muhamet Hajrullahu në Telegrafi.com ka thënë se rasti është ende në hetim dhe ende ka dyshime mbi helmimin në Deçan.
Nushi- Latifi gjatë intervistës ka thënë se për rastin në Deçan janë njoftuar më 10 korrik, ditë e shtunë.
“Ditën e shtunë jemi njoftuar që po ka disa pacientë me simptoma të gastritokolitit dhe normal dyshimi shkon te uji, se është procedurë profesionale te këto raste të sëmundjet hidrike, së pari analizohet uji. Natën e parë janë raportuar në Qendrën e Mjekësisë familjare në Deçan rreth 200 raste, dhe këto 200 raste në ditët në vazhdim janë rrit dhe kanë mbërri diku deri në 1 mijë e 500, e ndoshta edhe deri në 2 mijë janë raste të pa filtruara, qa do të thotë të pa filtruara që i njëjti pacient është lajmëruar tri herë, herën e parë për ankesë, herën e dytë me marrë infuzionin dhe herën e tretë gjithashtu”, ka thënë ajo
Në vazhdimësinë e bisedës, Nushi–Latifi deklaroi se raporti i fundit që kanë pranuar nga Qendra Rajonale në Pejë, thotë se deri më sot janë pranuar 557 pacientë nga komuna e Deçanit, të cilët kanë shprehur shqetësime shëndetësore.
“Ata kanë pasur simptoma, siç janë mundim, vjellje, dhimbje barkut, si dhe të njëjtën kohë 861 anketa epidemiologjike tek personat të cilët nuk kanë shqetësime, mirëpo e kanë pi të njëjtin ujë, pra janë mostër kontroll. Nuk kemi pasur raste të rënda, nuk po deklaroi që uji nuk ka mundur të mos participojë, pse po e them këtë është se në në Institut jemi ende në hulumtim. Çdo ditë jemi dukë bërë mostra, duke bërë anketa, janë duke u gjet burimet dhe shkaku. Sa i përket cilësisë së ujit, e gjithë kjo ka ndodhë në një sistem vetanak, i cili furnizon diku shtatë fshatra të Deçanit, ky ujë nuk ka pasur klor, është sistem i ndërtuar prej komunës. Ka dështime prej fillimit, ka pasur ngecje në funksionalizim, ende nuk ka klorizim të mirëfilltë në atë vend, përkundër faktit se uji është burimor. Në bazë të dhënave shkencore, nuk pritet me pas ndotje të madhe krahasuar me ujërat sipërfaqësore”, u shpreh ajo.