Rrugët e Durrësit notojnë në ujë. Kjo është situata ditën e sotme, pasi vendi u përfshi mbrëmjen e djeshme nga rrebesh shiu.
Problematike janë disa kryqëzime dhe segmente rrugore. Konkretisht bëhet fjalë për rrugët te kryqëzimi i stadiumit; rrethrrotullimi te stacioni trenit; rruga Taulantia; rruga Pavarësia në plazh. Prani të lartë uji ka edhe te rruga e Shkozetit çka e bën edhe më të vështirë kalimin si për makinat edhe për këmbësorët.
Përmbytja e rrugëve ka shkaktuar probleme me qarkullimin e makinave si dhe të qytetarëve në disa zona të vendit. E njëjta situatë paraqitet edhe në Lezhë. Moti me reshje në Lezhë ka sjellë edhe probleme me furnizimin me energji elektrike.
I gjithë territori ynë është përfshirë nga moti i keq prej pasdites së djeshme. Gazetari i ABC në Lezhë, Gjergj Figuri raporton se stuhitë gjatë natës dhe shkarkimet atmosferike kanë krijuar probleme në furnizimin me energji elektrike të disa fshatrave.
Për shkak se vijon të jetë moti me shira puna për rikthimin e energjisë është vështirësuar edhe pse po punohet nga grupet e punës. Moti i keq me reshje shiu dhe dëbore pritet që të vazhdojë deri të martën pasdite.
Me reshje shiu është zgjuar edhe mëngjesin e sotëm qarku i Elbasanit, duke shkaktuar rënien e inerteve në disa akse rrugore.
Të pranishme janë probelemet me fidrin nr.7 e nr.8 ku si pasojë ka mungesë furnizimi me energji në fisa fshatra përreth, si dhe fidri nr.4 në Bashkinë Carrik, i cili shkakton mungesa në Nj. Adm Mollas e Pishaj të Bashkisë Gramsh.
