I ftuar në emisionin “Pikat mbi i”, ish-shefi i Shërbimit Informativ Shtetëror, Fatos Klosi, bëri një parashikim të ngjarjeve që mund të ndodhin nesër në selinë e Partisë Demokratike. Klosi e krahasoi ngjarjen e nesërme me atë të 14 shtator 1998, ku mbështetës të armatosur të Partisë Demokratike arritën të merrnin nën kontroll institucionet shtetërore, por që i lëshuan përsëri pas një telefonate nga një shqiptar i Amerikës.

Klosi u shpreh se ngërçi i krijuar në PD nuk mund të zgjidhet kurrësesi duke marrë me forcë godinën, por do të zgjidhet në gjykatë.

“Unë e lexoj mbështetur mbi një eksperiencë timen, të shumë viteve më parë të 14 shtatorit 1998, ku zoti Berisha mori TVSH-në, mori Kryeministrinë, mori Ministrinë e Mbrojtjes. Berisha e ka provuar me shtetin këtë, por pasdite i lëshoi të gjitha pasi e mori në telefon një shqiptar nga Amerika.

Ai i tha ja i more të gjitha këto, nesër ça do bësh dhe me bisht në shalë ikën u mbyllën në Partinë Demokratike. Mua më duket e njëjta gjë. Problemi nuk është te godina, ja e more godinën çfarë do bësh. Problemi është shumë më i ngarkuar, të gjithë e kemi thënë që problem do të përfundojë në gjyqe që s’mbarojnë kurrë.

Berisha ka akoma filozofinë që beteja bëhet në rrugë, që fiton ai që ka më shumë mbështetës, që i ka pak më të ashpër, por nuk është më ajo kohë. Me sa duket ai këtu mbështetet këtu, ose mund të themi se nuk ka rrugë tjetër. Pas gjyqeve ajo parti do të ndahet në dy dhe më duket se këta po përplasen për godinën dhe vulat.

Lëvizjen e zotit Berisha e ndalon ligji. Kryetari i Partisë Demokratike mbrohet nga Garda e Republikës, është detyrë e gardës ta mbrojë kudo që ai është.

Shërbimet Sekrete të jashtme kanë detyrë të informojnë për ato çështje që cënojnë sigurinë kombëtare, por kanë zero mundësi për veprime operative”, tha Klosi.