Pothuajse tre tonë kokainë janë kapur në brigjet e ishujve Kanarie, në Spanjë, këtë të diel. Autoritetet spanjolle bëjnë me dije se lënda narkotike po transportohej me një anije peshkimi e fshehur në rezervuarin e karburantit të varkës.
Në pranga kanë përfunduar pesë anëtarët e ekuipazhit, mes të cilëve 4 turq dhe një gjeorgjian.
Të arrestuarit, anija, droga dhe procedurat policore do t’i kalojnë Gjykatës Kombëtare Spanjolle.
Pas një informacioni të ardhur se në anijen e peshkimit mund të transportohej drogë, autoritetet kanë bërë ndalimin e saj rreth 300 milje detare (mbi 550 kilometra) në jug të Kanarinave dhe më pas e kanë tërhequr drejt portit të Las Palmasit.
Kujtojmë se Spanja është porta kryesore për hyrjen e drogës në Evropë, me marihuanën që vjen nga Afrika e Veriut dhe dërgesat e kokainës që vijnë nga Amerika Latine.
