Kryetari i grupit parlamentar të Partisë Demokratike, Enkelejd Alibeaj i dërgoi sot një mesazh të koduar ish-kryeministrit Sali Berisha nga konferenca që u mbajt në kuadër të 100-vjetorit të marrëdhënieve mes Shqipërisë dhe SHBA-së, ku e pranishme ishte edhe ambasadorja Yuri Kim dhe ish- Sekretari i Shtetit Mike Pompeo.

Alibeaj tha se ka njerëz që duan t’i tregojnë rrugën Amerikës edhe pse vetë kanë humbur busullën dhe janë mbetje të mentalitetit komunist.

Sipas tij këto njerëz kanë humbur rrugën në oborr dhe duan t’ia humbin rrugën edhe Shqipërisë.

“Mbetjet e mentalitetit të diktaturës komuniste, pushtetarët e korruptuar, ata që kanë vënë interesin e tyre mbi atë të shqiptarëve kanë qenë dhe mbeten kërcënimi më i madh ndaj partneritetit tonë me ShBA.

Edhe sot ka ende të tillë. Ka njerëz që kanë humbur busullën e që duan t’i tregojnë rrugën Amerikës. Kanë humbur rrugën në oborr dhe duan t’ia humbin rrugën edhe Shqipërisë. Nuk do t’ia dalin. Nuk do t’ia dalin sepse kanë kundër shumicën dërrmuese të shqiptarëve dhe historinë e tyre mbi 100 vjeçare”, tha Alibeaj.

Për Alibeajn në një marrëdhënie të tillë partneriteti dhe vlerësimi në favor të shqiptarëve, Shqipëria dhe Partia Demokratike kanë vetëm një rrugë patriotike: të vazhdojmë të jemi në krah të SHBA.

Kujtojmë se ambasadorja Yuri Kim u shpreh se SHBA do të ndërpresë marrëdhëniet me Partinë Demokratike nëse Sali Berisha i shpallur non grata vjen në krye të kësaj partie.

Nga ana e tij Ish-sekretari amerikan i shtetit, Mike Pompeo, ka thënë gjatë fjalës së tij në kuadër të 100 vjetorit të vendosjes së marrëdhënies diplomatike mes Shqipërisë dhe SHBA-së se kjo miqësi e mirë do të vijojë edhe prej shekujsh të tjera.

Ai tha se Shqipëria dhe SHBA kanë bërë një punë të mirë në luftën kundër terrorizmit, ndërsa shtoi se në 30 vitet e fundit janë bërë përpjekje reale për rrënjëzimin e demokracisë. Sipas Pompeos, nuk ka rëndësi se cili është në pushtet, por e rëndësishme është të zhbëhet korrupsioni dhe konsolidohet liria e demokracia.