Dy persona janë arrestuar si autorë të dyshuar të vrasjes së ish-kreut të Komunës Velipojë dhe ish-ndërtuesit Pashko Ujka në Shkodër tre ditë më parë.

Një prej të ndaluarve është Kristian Kelmendi, ndërsa i dyti është Marjan Kola 53 vjeç, si person që është i përfshirë apo ka dijeni mbi vrasjen.

Ujkës i është bërë pritë pranë shtëpisë së tij, në lagjen “Vasil Shanto” në Shkodër. Ai mori plagë në shtyllën kurrizore dhe për pasojë humbi jetën në spital. Të dyshuarit dalin sot para gjykatës për masën e sigurisë.

Babai i Marjan Kolës ka folur sot para mediave dhe ka thënë se kërkon drejtësi. Sipas tij djali ka qenë në Kosovë me datë 28 dhe 29 nëntor, dhe këtë tregojnë kamerat.

“Djali u arrestua pa prova. Ai ka qenë në Kosovë. Kur është bërë ngjarja këtu ai ka qenë në Prishtinë. Ai ishte shok me personin tjetër të arrestuar. Ne se kemi njohur kurrë viktimën. Në kthim nga Kosova ata janë arrestuar”, ka thënë ai.

“Në kërkojmë drejtësi ga shteti shqiptar. Dje kam qenë në Kosovë dhe kam kërkuar që të nxjerrin kamerat policia atje. Kam bërë kallëzim”, ka thënë vëllai i Marjan Kolës.