Pesë persona janë arrestuar në Belgjikë për përdhunimin e dyshuar në grup të një vajze 14-vjeçare, e cila vdiq më pak se shtatë ditë më vonë.

Sipas mediave belge, imazhet e sulmit ndaj vajzës u shpërndanë në rrjetet sociale.

Viktima vdiq katër ditë më vonë, shkruan BBC.

Prokurorët thonë se tre të dyshuarit janë të mitur, ndërsa dy burra, të moshës 18 dhe 19 vjeç, janë arrestuar dhe pritet të paraqiten në gjykatë të mërkurën.

Prokuroria vetëm konfirmoi se ata po hetoheshin për “veprime të ndodhura pak para vdekjes së viktimës”.

Sipas raporteve të mediave belge, vajza organizoi një takim me një person në një varrezë në Ghent më 15 maj. Por thuhet se ai erdhi me katër të të tjerë dhe sulmoi viktimën. Imazhet nga sulmi u ngarkuan gjithashtu në rrjetet sociale.

“E gjithë bota e saj është shembur,” i tha babai i saj gazetës flamane Het Nieuësblad.

Rasti çoi në një përgjigje të fortë nga politikanët belg, ku Sekretarja e Shtetit për Barazinë, Sarah Schlitz u zotua të merrte hapa për të parandaluar ndarjen e imazheve të sulmit seksual në internet.

“Shpërndarja e imazheve të tilla në rrjetet sociale nuk është vetëm e padurueshme, por edhe plotësisht e paligjshme. Kjo thjesht nuk duhet të jetë e mundur,” tha ajo.

Liesbet Stevens, një ekspert i barazisë gjinore, i tha VRT News se sulmi “për fat të keq nuk është një rast i izoluar”, duke vënë në dukje se rreth 200 përdhunime bandash raportohen në Belgjikë çdo vit.