Njëri prej pasagjerëve që ndodhej brenda autobusit të kompanisë Zhitia Turist, i cili u aksidentua në Serbi, deklaroi se janë të gjithë mirë. Për ‘Klan Kosovën’ shqiptari tha se në momentin kur ndodhi aksidenti ishin të gjithë në gjumë.
“Pra ka ardhur një autobus tjetër për të na marrë. Jemi në afërsi të Krushevcit. Të gjithë kemi qenë duke fjetur në atë moment. Mes nesh ka pasur edhe fëmijë dhe një person me aftësi të kufizuara, por të gjithë jemi mobilizuar për t’i ndihmuar njëri-tjetrit dhe të gjithë jemi mirë”, deklaroi mes tjerash ai. Nga ana tjeter Qeveria e Kosovës, me anë të një komunikate në Facebook njofton se një zyrtar i tyre ka udhëtuar drejt vendit të ngjarjes ku ndodhi mbrëmjen e djeshme aksidenti, ku një autobus i një linje turistike kosovare u përmbys në anë të rrugës në Krushevc të Serbisë.
Sipas njoftimit të qeverisë së Kosovës, gjendja e të lënduarve është jashtë rrezikut, ndërsa kanë shprehur gatishmërinë maksimale për të ndihmuar të prekurit nga ky aksident.
“Një autobus i linjës Prishtinë-Graz (Austri) rreth orës 22:00 ka pësuar aksident në Kupci të Madh afër Krushevcit, në Serbi. Sipas informatave të para, janë 9 udhëtarë të lënduar në spital dhe të gjithë janë jashtë rrezikut për jetë. Kompania e udhëtimit ka nisur një autobus tjetër që t’i marrë udhëtarët që të vazhdojnë udhëtimin për në Graz. Zyrtari ynë ndërlidhës është rrugës për në spitalin e Krushevcit për t’i vizituar të lënduarit. Të lënduarve u urojmë shërim sa më të shpejtë. Institucionet e Republikës së Kosovës janë në kontakt të vazhdueshëm për të bërë gjithçka që është e mundur për të ndihmuar të prekurit nga ky aksident.”, thotë ndër të tjera kjo komunikatë e Qeverisë së Republikës së Kosovës.
