James C. O’Brien, i nominuar nga Presidenti Joe Biden si Koordinator për Politikat e Sanksioneve, i tha Komisionit të Senatit Amerikan për Marrëdhëniet me Jashtë, se administrata amerikane, me nxitjen e Kongresit, ka investuar burime të konsiderueshme për të hartuar dhe zbatuar sanksionet antikorrupsion.
“Jam i nderuar që Presidenti Biden dhe Sekretari Blinken më kanë emëruar si Koordinator për Sanksionet. Unë e kuptoj se sa të rëndësishme janë për ne sanksionet. Unë e kuptoj se është e qenësishme që ne të përforcojmë politikën e sanksioneve për t’i zbatuar ato plotësisht. Administrata jonë ka identifikuar njerëzit që do të jenë edhe në vijim targeti i sanksioneve. Së pari, sanksionet janë pjesë e strategjisë sonë. Ato janë mjete shumë të fuqishme dhe përdorimi ose kërcënimi nëpërmjet tyre është jashtëzakonisht efektiv në mbështetje të një strategjie koherente. Në këtë drejtim, Administrata jonë, me nxitjen e Kongresit, ka investuar burime të konsiderueshme për të hartuar dhe zbatuar sanksionet. Janë me qindra zyrtarë në Departamentin e Shtetit dhe të Thesarit, si dhe në agjenci të tjera që promovojnë antikorrupsionin, të drejtat e njeriut, luftën kundër terrorizmit, kundër narkotikëve, si dhe mbrojtjen e parimeve të tjera thelbësore të politikës së jashtme të SHBA-së”, tha koordinatori i Presidentit Biden.
Në një seancë dëgjimore në Senat, ai ka deklaruar se Administrata amerikane ka identifikuar njerëzit që do të jenë edhe në vijim shënjestër e sanksioneve dhe ato janë pjesë e strategjisë. Sipas O’Brien, ato janë mjete shumë të fuqishme dhe përdorimi ose kërcënimi nëpërmjet tyre është jashtëzakonisht efektiv në mbështetje të një strategjie koherente.
“Unë jam i përkushtuar për të bërë gjithçka që ne të ruajmë dhe rrisim efektivitetin e sanksioneve. Nëse konfirmohem, mezi pres që të punoj me zyrtarët përgjegjës për të zbatuar edhe mjete të tjera të politikës sonë të jashtme dhe ekonomike. Çdo sanksion, sado i justifikuar mirë, duhet të mbështetet në analizën e alternativave, efekteve dhe mbështetjes nga partnerët tanë. Kjo kërkon që qëllimi i tij të kuptohet përtej qeverisë së SHBA-së, që ne të punojmë me qeveritë e tjera, që të realizohen objektivat e sanksioneve. Zyra e Koordinatorit të Sanksioneve nuk mund ta bëjë këtë vetëm dhe suksesi i zyrës do të kërkojë edhe bashkëpunimin e kolegëve në Departamentin e Shtetit dhe veçanërisht nga ambasadat tona”, u shpreh James C. O’Brien në Senat.
Sipas tij, “sanksionet janë vendimtare për luftën kundër korrupsionit. Administrata jonë ka paraqitur një strategji të fuqishme për këtë dhe Sekretari Blinken do të emërojë një drejtues të lartë në rang koordinatori për antikorrupsionin. Nëse konfirmohem, mezi pres që të punoj me të për të evidentuar aktorët e korruptuar, networkun e tyre, rrjetet që i ndihmojnë ato. Gjithsesi, duhet të jemi të kujdesshëm të mos ndëshkojmë pa prova dhe të lëndojmë të pafajshmit”./ panorama
