Igor Volobuev, një nga drejtuesit më të lartë të bankës ruse Gazprombank, njoftoi se ishte larguar nga Rusia për të luftuar përkrah forcave ukrainase.

Lajmin e ka bërë të ditur media ruse, “Moscow Times”.

Volobuev, i cili është 50 vjeç dhe ka punuar për 33 vite në kompanitë e lidhura me tregun e gazit në Rusi, tha se u largua nga Rusia më 2 mars dhe iu bashkua forcave të mbrojtjes territoriale të Ukrainës.

“Kjo që po bën Putin është krim. Por nuk është Putini ai që kryen ato vrasje, që vjedh gjithçka, madje edhe tualetet, ai që përdhunon gratë: janë rusët. Dhe unë gjithashtu kam pjesën time të përgjegjësisë: do të turpërohem për pjesën tjetër të jetës sime”.

“Askush nuk e dinte për arratisjen time në Moskë”, tha Volobuev, i cili foli gjithashtu për vdekjen misterioze të ish-zëvendëspresidentit të Gazprombank Vladislav Avaev në Moskë dhe menaxherit të Novatek Sergej Protosenya në Spanjë.

“Unë nuk mendoj se ishte vetëvrasje”, tha ai, “vdekja e tyre mund të ketë qenë e skenuar. Ata dinin shumë”.

Në fund të marsit, Anatolij Chubais, ish-zëvendëskryeministri i Jelcinit, u largua nga Rusia. Nënkryetari i parë i bordit të Sberbank, Lev Khasis, dhe zëvendësdrejtori i Aeroflot Andrei Panov gjithashtu u larguan.