Rrugët e Shqipërisë janë përgjakur mëngjesin e sotëm. Tre aksidente me pasojë vdekjen kanë ndodhur gjatë orëve të para të së enjtes.

Rreth orës 04:00, në autostradën Kalimash – Morinë, në afërsi të urës së Kolshit, një automjet tip “Benz”, ku udhëtonin dy të rinj ka dalë nga rruga dhe ka rënë në humnerë.

Për pasojë ka humbur jetën 25 vjeçari me iniciale A. Rr., nxjerrja e trupit të së cilit është bërë nga shërbimet e Policisë dhe të Zjarrfikëses.

Ndërsa 19 vjeçari Xh. L ., është dërguar në Spitalin e Traumës në gjendje të rëndë shëndetësore.

Rreth 30 minuta më vonë, një tjetër aksident ka ndodhur aksin rrugor Milot – Mamurras, në afërsi të Mbikalimit të Sanxhakut.

Drejtuesi i një taksie, shtetasi L.D., 40 vjeç, i cili po transportonte 3 pasagjerë drejt Rinasit ka humbur kontrollin e mjetit, duke dalë jashtë rruge.

Për pasojë, ka ndërruar jetë 56-vjeçarja Prena Gjetani., e cila ishte pasagjere. Ndërsa vajza e viktimës shtetasja A.Gj. 30 vjeçe, 2 nipërit e saj të mitur, si edhe drejtuesi i taksisë, kanë mbetur të plagosur dhe janë dërguar në spital ku ndodhen nën kujdesin mjekësor.

56-vjeçarja së bashku me familjen e saj po udhëtonin drejt aeroportit të Rinasit pasi kishin planifikuar një fluturim drejt Italisë.

Dyshohet se shkak për aksidentin është bërë përgjumja e drejtuesit të mjetit.

Ndërsa aksidenti i tretë, ndodhi rreth orës 08:00, në fshatin Boçovë të Fierit.

Shtetasi E. M., 43 vjeç, duke punuar me zetor në tokat e fshatit Boçovë, ka humbur kontrollin e drejtimit të mjetit, ka rënë në kanal dhe për pasojë ka ndërruar jetë.

Grupi hetimor po punon për zbardhjen e plotë të rrethanave të ngjarjeve.