Qytetarët në Britaninë e Madhe do të përballen me ditën më të nxehtë të vitit që do të arrijë temperatura rekord në orët e pasdites.

Trenat kanë anuluar udhëtimet ndërkohë që vizitat në spitale janë ndërprerë. Edhe disa shkolla sot kanë qëndruar  të mbyllura mes alarmit të dhënë nga autoriteteve se shumë persona mund të rrezikojnë jetën në rast se i përkasin kategorive të riskuara.

Temperatura më e lartë deri në tani është regjistruar në orën 13:00, duke arritur në 36 gradë celcius në Cambridge, duke iu afruar rekordit prej 38 gradësh që u vendos në të njëjtin qytet në korrik të vitit 2019.

Sot është shënuar dita më e nxehtë për vitin 2022 duke arritur për të dytën ditë radhazi temperatura mbi 33 gradë, gjë që është e pazakontë për klimën në Mbretërinë e Bashkuar.

Kjo situatë ka rikthyer praktikën e punës nga shtëpia për shumë sektorë ndërsa disa të tjerë e kanë ndërprerë aktivitetin e tyre për dy ditë.

Mjekët u kanë bërë thirrje qytetarëve të mos dalin nga shtëpitë e tyre nëse nuk kanë emergjenca mes frikës se spitalet mund të mbingarkohen.