Evropa Perëndimore u ndesh këto ditë me një valë rraskapitëse të të nxehtit, ku termometri arriti shifra rekordesh historike.
Mbretëria e Bashkuar, e cila ka zakonisht një klimë më të butë, pa për herë të parë temperatura më shumë se 40 gradë celcius.
Gjermania pa ditën e saj më të nxehtë të vitit deri më tani, ndërsa Portugalia pësoi një rritje të vdekjeve si pasojë e temperaturave të larta.
Zjarret vdekjeprurëse kanë përfshirë kontinentin. Organizata Botërore Meteorologjike e OKB-së (ËMO) paralajmëroi se situata do të shkojë edhe më keq.
Valët e të nxehtit janë bërë më të shpeshta dhe më intensive dhe zgjasin më gjatë për shkak të ndryshimeve klimatike të shkaktuara nga njerëzit.
“Në të ardhmen, këto lloj valë të nxehti do të jenë normale dhe ne do të shohim ekstreme edhe më të forta,” tha shefi i ËMO Peterri Taalas.
Përveç temperaturave rekord në Britaninë e Madhe, problematike është dhe situata e zjarreve në shumë vende.
Një zjarr i madh në Ëennington, në lindje të Londrës, ka djegur dhe banesa. Banorët që duhej të evakuoheshin i thanë BBC-së se rreth tetë shtëpi dhe ndoshta një kishë lokale ishin shkatërruar nga zjarri, ndërsa një zjarrfikës në vendngjarje e përshkroi atë si “ferr absolut”.
Në Francë , 64 zona të ndryshme regjistruan temperatura rekord të hënën.
Megjithëse niveli më i lartë i të gjitha kohërave për Francën kontinentale nuk është arritur, jugperëndimi i vendit ka përjetuar zjarret më të mëdha në më shumë se 30 vjet. Që nga 12 korriku, zjarret kanë përfshirë më shumë se 20,300 hektarë të rajonit të Gironde.
Gati 37,000 njerëz duhej të evakuoheshin nga shtëpitë e tyre.
Moti më i freskët tani është rikthyer në Mbretërinë e Bashkuar dhe Francë.
Në Belgjikë , një zjarr shpërtheu në dunat në resortin belg të De Haan, duke djegur disa automjete. Por pas vapës së egër, vendi tani po përgatitet për stuhi që mund të çojnë në 20-30 mm shi në disa rajone, raporton gazeta Le Soir.
Paralajmërimet e motit janë ende në fuqi në Gjermani pasi vala e të nxehtit vazhdon të lëvizë në veri dhe lindje.
Të martën, vendi përjetoi ditën e tij më të nxehtë të vitit 2022. Shërbimi kombëtar i motit regjistroi temperaturën 39.5C në qytetin perëndimor të Duisburgut. Holanda gjithashtu arriti të njëjtin nivel prej 39.5 gradë Celsius në Mastriht, thanë sinoptikanët.
Temperaturat në Portugali janë ulur ndjeshëm. Megjithatë, më shumë se 1000 vdekje të lidhura me valët e të nxehtit janë regjistruar që nga java e kaluar.
Zjarret janë bërë një pasojë e zakonshme e këtyre temperaturave ekstreme në të gjithë Evropën.
Spanja qendrore dhe veriperëndimore gjithashtu është shkatërruar nga zjarret.
Shërbimi i monitorimit Copernicus – pjesë e programit të BE-së për vëzhgimin e Tokës – tha se emetimet totale të karbonit nga zjarret midis qershorit dhe korrikut janë më të lartat e vërejtura në Spanjë për periudhën që nga viti 2003.
Në Greqi , një zjarr i ndezur nga erërat e forta u ndez në rajonin malor të Penteli, pranë Athinës. Ai ka dëmtuar shtëpitë dhe ka bërë që autoritetet lokale të evakuojnë të paktën katër zona dhe një spital.
Sinoptikanët në Itali paralajmërojnë temperatura deri në 40-42 gradë Celsius mes të mërkurës dhe të premtes.
