Kryeministri Edi Rama ka folur në lidhje me sulmet kibernetike të Iranit ndaj Shqipërisë.

Rama thotë se ekspertët kanë arritur në përfundimin se sulmet kanë pasur qëllim të shkatërrojnë çdo sistem, ndërsa tha se dokumentet ku kanë pasur akses hakerat, nuk janë sekrete.

Pyetje: Sa e përgatitur është sot Shqipëria me përballu ndonjë sulm tjetër të mundshëm kibernetik e sa të sigurta janë të dhënat tona?

Edi Rama: Ky është një shqetësim i madh, i ri se ne kemi sulme të vazhdueshme kibernetike prej shumë vitesh por të një shkalle të ulët nga pikëpamja e aftësisë dhe shpejtësisë së penetrimit.

Gjithë këto flukse sulmesh, të regjistruara kanë qenë sulme të pasuksesshme.
Ndërkohë që ky është agresion i mirëfilltë luftarak në botën e internetit dhe të gjithë sistemeve digjitale. Një agresion i egër që ka pasur qëllim të qartë, zhdukjen përfundimtare të të gjithë të dhënave e shkatërrimin pa kthim të gjithë sistemeve duke lënë tokë të djegur nga mbrapa.

Ky është konklusioni i ekspertëve që na kanë mbështetur dhe zotërojnë njohurinë më të madhe sot, ekspertët e Mikrosoftit.

Dëmet janë shumë më të lehta se sa shkalla e agresivitetit. Sistemet janë kthyer në punë, të dhënat janë krejtësisht irrelevante sa i përket sensitivitetit të tyre.

Një pjesë e tyre janë publikuar, vendime qeverie, shkresa që qarkullojnë në rrjetin e brendshëm që mund të merren nga cdo i inteesuar me një kërkesë të thejshtë, nuk janë dokumente sekrete.

Cdo gjë tjetër ka pasur qëllim dezinformimin.