Orëve të vona të së hënës, Belgjika është tronditur nga vrasja e një të riu në afërsi të zonës ku banonte.

Pasi është përballur me krimin e rëndë, Policia menjëherë ka bërë verifikimin e viktimës dhe ka mësuar se bëhej fjalë për një të ri që ishte i martuar me shtetase belge dhe ishte baba i një fëmijë e për pasojë, menjëherë është përjashtuar pista e vrasjeve për larje hesapesh apo trafik droge, siç edhe kanë ndodhur kohëve të fundit në vendin e tyre. Ata nisën verifikimet dhe pas marrjes së dëshmive të para, bëhet me dije se kanë vënë në pranga një person, prangosje që është bërë pak orë pas krimit të rëndë.

Mediat vendase e pasqyruan lajmin me detaje të pakta ndërkohë që Policia lokale nuk e dha emrin e plotë të viktimës dhe nuk e identifikoi fare se kush ishte i dyshuari i arrestuar për ekzekutimin me pesë plumba të djalit të identifikuar publikisht si Ilir S., nga Shqipëria, 28 vjeç. Mjekët ligjorë, pasi kanë kryer autopsinë, i kanë dorëzuar Policisë dhe prokurorisë edhe raportin, në të cilin kishin përcaktuar jo vetëm nga i kishte ardhur vdekja të riut shqiptar, por edhe sa plagë plumbash kishte në trupin e tij të pajetë. Por 24 orë pas kryerjes së atij krimi të rëndë, mediat vendase raportojnë se personi i vënë në pranga është pikërisht vjehrri i tij, i cili për asnjë moment nuk e ka pranuar autorësinë. Në dëshminë e parë që ka dhënë orëve të pasdites së djeshme në Gjykatë, ai ka lënë të kuptohej se ata kishin pakënaqësi me njëri-tjetrin, por kurrë nuk do ta vriste të atin e nipit të tij.

NGJARJA, SIPAS MEDIAVE VENDASE

Orëve të vona të datës 18 korrik, Policia belge kishte marrë informacion për një vrasje me armë zjarri. Sipas të dhënave, ngjarja ndodhi në Koekelare, përgjatë IJzerdijk në Stuivekenskerke, afër Diksmuide. Bëhet fjalë për 28- vjeçarin Ilir S., i cili u vra me të paktën gjashtë plumba. Siç raportojnë mediat belge, viktima ishte duke qëndruar pranë motoçikletës së tij kur u qëllua disa herë me armë. Ndonëse atij iu dha ndihma mjekësore, nuk mundi t’u mbijetonte plagëve të marra. Shqiptari la pas gruan dhe një fëmijë. Në vendin e ngjarjes u gjetën shumë gëzhoja arme. Ndërkohë, prokurori publik konfirmon se tashmë ka mundur të arrestojë një të dyshuar. Ai do të paraqitet nesër para gjykatës hetuese. Deri më tani nuk dihen rrethanat e ngjarjes në fjalë, ndërsa autoritetet belge janë duke hetuar mbi motivet e vrasjes.

ARRESTIMI

Vjehrri është i dyshuari kryesor për vrasjen e 28- vjeçarit shqiptar në Belgjikë Ilir S. Mediat belge shkruajnë se Stephane V., 55 vjeç, është vënë në pranga herët në mëngjes pas vrasjes. Ai mohon të ketë qëlluar mbi babanë e nipit të tij, por hetuesit mendojnë ndryshe. “Mes nesh ka pasur probleme dhe nuk kemi shkuar mirë, por nuk e kam vrarë unë”, ka deklaruar ai. Burri është sjellë para gjykatës hetuese pasditen e sotme dhe është arrestuar. “Tani duam një analizë të gjurmëve të barutit sa më shpejt të jetë e mundur”, tha avokati i tij, Bram Elyn. 28- vjeçari Ilir S. u vra me të paktën gjashtë plumba.